ROXAS CITY – Ginakabig nga isa ka damgo sang tatlo kaconstruction workers ang na-experiensiyahan nga matulog sang siyam ka adlaw sa ulumhan gamit ang isa ka trapal.
Sa interview sang Bombo Radyo Roxas kay Isidro Amaba sang Barangay Balucuan, Sigma, Capiz, ginpahayag sini nga mga construction workers sila nga nagatrabaho sa Miag-ao, Iloilo, apang nagdesisyon nga magpauli sa Capiz matapos nga wala na sila ginsuportahan sa pagkaon sang inhenyero nga nagkuha sang ila nga serbisyo.
Aminado ini nga nangin mabudlay ang ila pagpauli bangud matapos nga nagsakay sa jeep naglakat sila tobtob makigtransaksyon sa duha ka mga tricycle nga magadul-ong sa ila sa banwa sang Dumarao sa balor nga P1,200.
Apang bangud sa ginapatuman nga istrikto nga border security control sa banwa sang Dumarao wala sila ginpahanugutan nga makasulod.
Suno kay Amaba nga wala sila sang nahimo kag nagpakitluoy sa tag-iya sang ulumhan nga ila ginpahamtangan sang trapal para may yara sila sang matulugan.
Sa sulod sang siyam ka araw gin-antos sang mga construction workers ang kabudlay sa pagtulog.
Apang bangud wala naagwantahan sang duha nila ka mga kaupod nagpangita sila sang pamaagi agud makapauli sa ila mga balay.
Sa bulig sang Bombo Radyo napalab-ot sa provincial government ang sitwasyon sang mga construction workers nga gilayon ginpadalhan sang mga folding beds kag mga relief goods.
