ROXAS CITY – Dakop ang tatlo ka mga drug suspek sa ginkasa nga drug buybust operation sang Station Drug Enforcement Team sang Roxas City Police Station sa Roxas Avenue, Roxas City.
Ginkilala ang mga naaresto nga sanday Jetjet Alberto, 21 anyos sang Barangay 8; John Mark Distor, 25 anyos sang Barangay 9; kag Cristel Ann Alcazaren, 23 anyos sang Barangay Mongpong, sining siyudad.
Mahibaluan nga narekober sa mga suspek ang walo tanan ka sachets sang ginapatihan shabu nga ginabulubanta nagabalor sang P65, 000, cellphone, pouch, kag P500 nga marked money.
Suno sa mga otoridad, madugay nga ginpaidalom sa monitoring ang subject nga si Alberto antes ginkasa ang operasyon kun sa diin naaresto man sanday Distor kag Alcazaren nga ginapahayag una sini nga ka-transaksiyon.
Mahibaluan nga nagbato pa si Alberto sa mga otoridad kag nagtuyo nga magpangbuno kun sa diin nadaplisan sang kutsilyo ang duha ka mga pulis nga napilasan sa kamot.
Gindugang pa ni Police Master Sergeant Ramil Arcangeles, tagpamaba sang Roxas City PNP, gindakop man ang tiyo ni Alberto nga si Jojo Alberto bangud sa ginhimo sini nga ‘obstruction’ sa ila operasyon.
Magapangatubang ang mga suspek sa panumbungon nga paglapas sa Republic Act 9165 ukon Comprehensive Dangerous Drugs Act of 2002.
