ROXAS CITY – Dakup sa akto ang tatlo ka mga drug suspek nga naga-pot session sa isa ka beach resort sa Barangay Natividad, Pilar, Capiz.
Ginkilala ang mga drug suspek nga sanday Rey Engarcial 33-anyos sang Barangay Pusok, Lapu Lapu City, Cebu, Rhandy Tandoy Jr., 22-anyos sang Barangay Basak San Nicolas, Cebu City kag Alvin Kho 48-anyos sang Barangay Kamamalan, Cagayan de Oro City.
Nakabaton sang impormasyon ang Pilar Municipal Police Station gikan sa caretaker sang Tirol Beach resort nga may tatlo ka mga drug suspek nga nagcheck-in sa resort kag naga-pot session.
Gilayon nga ginpadulungan sang mga kapulisan sa pagpanguna ni Police Captain Alfred de Leon ang nasambit nga resort kag naaktuhan nga naga-pot session ang tatlo.
Narekober sa mga drug suspek ang duha ka empty sachet nga may shabu residue, aluminom foil, blade kag duha ka cellphone.
Samtang nakuha sa bulsa ni Engarcial ang isa ka sachet sang shabu kag cellphone.
Yara karon sa kostodiya sang mga otoridad ang tatlo ka mga drug suspek kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
