ROXAS CITY – Arestado ang tatlo ka mga drug suspek nga sakay sa delivery trak sang manok sa ginpatigayon nga drug buy bust operation sa national highway sa Barangay Bolo, sining syudad.
Ginkilala ang mga drug personalities nga sanday Froilan Magno sang Barangay San Jose, Roxas City, drug surrenderee kag subject sang operasyon, driver sang trak nga si Arnel Polendey 43-anyos sang Barangay Badiangon, President Roxas kag Franklin Calinao sang Barangay Bolo, Roxas City.
Masobra sa isa ka semana ang monitoring sa iligal nga aktibidad ni Magno antes ginpatigayon ang operasyon sang mga pulis.
Sa interview sang Bombo Radyo kay Magno gin-ako sini nga nagagamit isa gihapon ini sang iligal nga droga sa pihak nga nagsurrender ini sa Oplan Tokhang sang mga pulis, apang hugot nga ginapanginwala nga nagaduso ini sang shabu.
Suno naman sa driver sang trak nga si Polendey, wala ini sang ideya sa iligal nga aktibidad nga ginadalahigan ni Magno.
Suno diri nga ginkakibot na lamang sini sang makita nga ginalagas sila sang isa ka pribado nga salakyan.
Sa pagdumdum nga emergency, nagpahigad ini apang ginkatingala nga nag-untat ang salakyan kag hinali nga nagguwa ang mga pulis.
Samtang narekober ang 12 ka sachet sang shabu, P500 nga marked money, sling bag kag trak nga ginsakyan sang tatlo ka mga suspek.
