ROXAS CITY – Yara na sa isa ka quarantine facility sa Atabay Elementary School sa San Jose de Buenavista Antique ang tatlo ka mga Capizeño construction workers nga nauna nagpangayo sang bulig sa alkalde sa banwa sang Mambusao, Capiz nga makapauli sa ila mga balay.
Sa pagpakig-angut sang Bombo Radyo kay Ronilo Ledesma, isa sa tatlo ka mga construction worker, ginpahayag sini nga wala sila ginpahanugutan nga makasulod sa probinsiya sang Capiz agud makapauli kuntani sa banwa sang Mambusao sa baylo ginpadul-ong sila sa ambulansiya pabalik sa isa ka quarantine facility sa Antique kaupod ang mga nurses kag pulis.
Suno kay Ledesma sa kapin 61 ka mga indibidwal nga ginpaidalum sa quarantine sa amo nga facilidad, tatlo lamang sila ang mga Capizeño nga gintingub sa isa ka hulot.
Nagalaum si Ledesma kag ang duha ka mga kaupod nga sanday Dino Ledesma kag Ruel Adolfo nga makapauli na sila sa banwa sang Mambusao kun matapos na ang ila 14-day quarantine.
Samtang ginkumpirma sang tatlo nga nagpadala sang mga relief goods ang lokal nga gobyerno sang nasambit nga banwa.
