ROXAS CITY – Pilason ang tatlo ka mga indibidwal matapos ang nagluntad nga kinagamo sa Barangay Pawa, Panay, Capiz.
Base sa inisyal nga imbestigasyon sang Panay PNP nga samtang nagapungko ang biktima nga si Victor Billones 51-anyos hinali na lamang ini nga ginbungguan sang motorsiklo sang mga suspek nga sanday Obaldo Nicson Besana kag Benjie Besana nga lunsay mga residente sang nasambit nga lugar.
Magluwas diri, ginhangkat pa sang mga suspek ang biktima sang away.
Nahibaluan nga may yara sang dala nga kutsilyo si Nicson nga tuyo naman kuntani nga bun-on ang biktima.
Samtang, ginlampusan naman ni Benjie sang tubo sa ulo si Billones.
Madasig naman nga nakapalagyo ang biktima samtang ginakastigo ini kun sa diin nagkuha man ini sang pala nga amo naman ginamit sini sa paglampos sa mga suspek.
Bangud diri, lunsay nag-angkon sang mga pilas sa magkatuhay nga porsyon sa lawas ang tatlo nga gilayon naman gindala sa ospital para sa nagakaigo nga pagbulong.
