ROXAS CITY – Patay ang tatlo ka mag-ululutod nga laborers matapos ma-trap sa isa ka water tank sa Maindang National High School sa Barangay Maindang, Cuartero, Capiz.
Ginkilala ang mga biktima nga sanday Dodong Vargas, Kano Vargas kag Jason Vargas, lunsay mga residente sang Barangay Majanlud, Sapian, Capiz.
Sa interview sang Bombo Radyo kay Cuartero Municipal Disaster Risk Reduction and Management Office (MDRRMO) Head Ronald Guillermo, ginpahayag sini nga posible na-suffocate ang mga biktima bangud sa tuman ka baho nga kemikal sa nasambit nga water tank.
Mahibaluan nga ginmanduan ang mga biktima sang ila nga foreman nga magpatigayon sang clearing sa amo nga eskwelahan apang indi kalakip ang water tank sa ila nga pagatinluan.
Sa pihak sini, ginbuksan sang mga biktima ang water tank, kun sa diin nagsulod ang mga ini kag na-trap sang halos isa ka oras tubtob sa ginbawian sang ila kabuhi sa sulod.
Mahibaluan nga may isa pa kuntani nga kaupod ang tatlo ka mga laborers apang wala ini nagsulod sa water tank bangud indi niya matakudan ang tuman ka baho nga kemikal.
