ROXAS CITY – Natalana nga pasakaan sang panumbungon nga paglapas sa RA 9165 ukon Comprehensive Dangerous Drugs Act of 2002 ang tatlo ka mga manunudlo nga nagatudlo sa mga out of school youth matapos madakpan sa akto nga naga-pot session sa isa ka beach resort sa Barangay Natividad, Pilar, Capiz.
Matapos magpaidalum sa drug test ang mga manunudlo nga sanday Rey Engarcial 33-anyos sang Barangay Pusok, Lapu Lapu, Cebu, Rhandy Tandoy Jr., 22-anyos sang Barangay Basak San Nicolas, Cebu City kag Alvin Kho 48-anyos sang Barangay Kamamalan, Cagayan de Oro City gilayon sila nga ginhunong sa karsel sang Pilar PNP.
Sa interview sang Bombo Radyo Roxas kay Police Captain Alfred de Leon, hepe sang Pilar PNP, ginpahayag sini nga nakabaton sila sang impormasyon gikan sa caretaker sang Kamalig ni Tirol Beach resort nga may tatlo ka mga lalaki nga nagcheck-in sa resort nga naga-pot session.
Naabtan pa sang mga pulis ang tatlo nga yara sa kainitan sang ila nga pot session kag wala na nagtuyo pa nga magpalagyo bangud ila nahibaluan nga napalibutan na sila sang mga otoridad.
Narekober sa mga drug suspek ang duha ka empty sachets nga may shabu residue, aluminom foil, blade kag duha ka mga cellphones
Samtang nakuha sa bulsa ni Engarcial ang isa ka sachet sang shabu kag cellphone.
