ROXAS CITY – Duha ka mga construction worker kag isa ka estudyante ang naghikog sa separado nga lugar sa probinsiya sang Capiz kag syudad sang Roxas.
Sa Barangay Sto. Niño, Dumalag, nasapwan na lamang ni Mrs. Rosaline Logo ang anak nga si Jeril Logo 23-anyos kag isa ka construction worker nga nagabitay sa sulod sang iya hulot.
Nagsulod sa kuwarto sang anak si Mrs. Logo para magdul-ong sang gatas, apang nakibot na lamang ini sang makita nga nagabitay na ang biktima gamit ang ginsugpon nga mga panapton.
Ginaalegar nga may yara sang nervous breakdown ang biktima.
Kumbinsido naman ang pamilya Logo nga wala sang foulplay sa kamatayon sang ila himata.
Samtang nagabitay na sa balayan sang ila balay ang construction worker nga si Samuel Felasol 37-anyos sang Barangay Concepcion, Dumalag, Capiz sang nasapwan sang asawa nga si Criselda Felasol.
Ba-se sa inisyal nga imbestigasyon sang Dumalag PNP nga antes ang insedente nag-inum pa ang biktima kaupod ang mga abyan.
Nagtawag pa ini sa iya magulang sa diin nagbuhi sang tinaga nga magahikog, apang ginbalewala lamang ini sang magulang sa pagpati nga nagalahog lahog lamang ang iya manghod.
Samtang isa sa ginatan-aw motibo sa pagpanginmatay ni Felasol amo ang ila masami nga pag-away sang iya asawa.
Nagapati naman ang pamilya sang biktima nga wala sang foulplay sa kamatayon sang construction worker.
Sa pihak nga bahin, dead on arrival sang mag-abot sa ospital ang isa ka estudyante sang isa ka pribado nga unibersidad sa syudad sang Roxas matapos nga naghikog sa ila puluy-an.
Ginkilala ang biktima nga si Emmanuel Wood Besana 18-anyos, isa ka atleta sang nasambit nga buluthuan.
Ginpahayag nga antes naghikog ang biktima, nagpost pa ini sang halangpon nga mga tinaga sa iya social media account.
Sa karon padayon ang imbestigasyon sang kapulisan agud matumod ang nagtulod sa biktima para utason ang iya nga kabuhi.
