ROXAS CITY – Ginkumpirmar sang Philippine Army nga ang tatlo ka mga kababainhan nga subject sa ginpatuman nga search warrant sang mga otoridad kahapon nga adlaw sa Happy Homes Subd., Brgy. Sibaguan, sini ga syudad, ang mga miyembro sang Communist Party of the Philippines-New People’s Army-National Democratic Front (CPP-NPA-NDF).
Sa interview sang Bombo Radyo kay Captain Kim Apitong, tagpamaba sang 3ID sang Philippine Army, ginpahayag sini nga ang mga subject nga sanday Cirila Cordon Estrada alias “Cora” ukon “Sheila Gonzales”, Lenilyn Custorio Jaynos alias “Sandra” ukon “Elizabeth”, kag Marivie Bartolome Arguelles, ang yara sa listahan sang Regional Finance Staff sang Komite Rehiyong Panay sa idalom sang CPP-NPA-NDF.
Dugang pa ni Apitong nga kabahin ang mga suspek sa ‘urban’ efforts sang rebelde nga grupo kun sa diin sila ang gindesignar nga magpangilkil sa mga negosyante, nga ginagasto sang mga yara sa kabukiran.
Sa pagkamatuod, narekober ang mga listahan sang mga establisiyemento nga ginapangilkilan sang mga suspek.
Sa karon, yara sa paghinakop sang mga kapulisan ang nadakpan nga si Lenilyn Custorio Jaynos alias “Sandra” samtang at-large ang duha nga sanday Cirila Cordon Estrada alias “Cora” kag Marivie Bartolome Arguelles.
Pagapasakaan sang kaso nga paglapas sa R.A 9516 ukon “Illegal Possession of Explosives” bangud sa nakuha sa lugar nga mga pampasigabong kag armas-luthang.
