ROXAS CITY – Nadakpan sang mga katapo sang bantay-dagat sang Panay ang tatlo ka mga persona nga nagapanguha sang tahong, sa kadagatan nga sakup sang Barangay Agojo, sa nasambit nga banwa.
Ginkilala ang mga ini nga sanday Arthur Valderama, 41-anyos, Argie Lipardo, 22-anyos kag Nelson Itang, 25-anyos, lunsay mga residente sang Brgy. Yabton, sa banwa sang Ivisan, apang temporaryo nga nagapuyo sa Panay.
Sa impormasyon nga nakuha sang Bombo Radyo sa Panay MPS, nga samtang nagapatigayon sang seaborne patrol ang mga katapo sang bantay-dagat, ila nasiplatan ang nasambit nga mga persona.
Ginlapas sang mga ini ang Fishery Administrative order No. 235 ukon Safety and Quality Control Standard for Paralytic Shellfish Poison pursuant sa RA 8550 ukon ang ‘Fisheries Code’.
Matandaan nga ginabawalan sa karon ang pag-harvest, pagkonsumo ukon pagbaligya sang panginhason nga makuha sa kadagatan sang probinsya bangud sa red tide.
Sa karon, ginkustodiya ang mga ini sa Panay MPS kag MENRO-Panay para sa nagakaigo nga disposisyon.
