ROXAS CITY – Arestado ang tatlo ka mga persona matapos nga ginserbihan sang mga kapulisan sang warrant of arrest sa magkatuhay nga mga lugar sa banwa sang Pilar, Capiz.
Ginkilala ang mga nadakpan nga sanday Erin Bartiso, 36 anyos sang Barangay Blasco kag ginserbihan sa Barangay San Blas sang amo nga banwa.
Subongman, ang mag-amay nga sanday Elmer Millares 52-anyos kag Jennery Millares 25-anyos nga lunsay mga residente sang Barangay San Blas kag ginserbihan naman sa Barangay Cayus sang nasambit nga banwa.
Kaso nga Frustrated Murder ang ginapangatubang sang nasambit nga mga persona.
Ang nasambit nga warrant of arrest ginpapanaug kag ginpirmahan ni Judge Oscar Leo S. Villena sang RTC Branch 66, Barotac Viejo.
Ginrekomendar naman sang korte ang P200,000 nga piyansa para sa temporaryo nga kahilwayan sang tagsa ka mga arestado.
Sa karon, nakahunong na sa karsel sang Conception Municipal Police Station sa Iloilo ang nasambitan nga mga akusado.
