ROXAS CITY – Ginpasakaan na sang panumbungon sa Provincial Prosecutors Office ang tatlo ka mga suspek sa paghold-ud sa isa ka lending collector sa Barangay Binuntucan, Pontevedra, Capiz.
Ini ang ginpahayag ni Police Lt. Judesses Catalogo, deputy chief of police sang Pontevedra Municipal Police Station sang mainterview sang Bombo Radyo Roxas.
Suno kay Catalogo, kaso nga Robbery under the article 295 of revised penal code ang ginpasa sa mga suspek nga sanday Rowel Agris, Ronnel Agris kag Jetley Sucgang lunsay mga residente sang Barangay Cabungahan, Maayon Capiz.
Matandaan nga may yara sang nagpalab-ot sang impormasyon sa mga kapulisan natuhoy sa description sang mga suspek kun sa diin positibo nga gintudlo sang biktima nga si Ronaldo Alcazaren ang nasambit nga mga indibidwal nga naghold-up sa iya.
Gilayon man nagpatigayon sang hot pursuit operation ang mga kapulisan matapos nga nagdangop sa Pontevedra PNP si Alcazaren matapos nga gin hold-up ini sang tatlo ka mga suspek.
Kalakip naman sa mga gintaban amo ang cellphone, P1,000 cash kag P50,000 nga cash gikan sa koleksyon sang nasambit nga lending collector.
Sa karon, nakahunong na sa karsel sang Pontevedra Municipal Police Station ang nasambit nga mga suspek.
