ROXAS CITY – Ginhilway na sa karsel ang tatlo ka mga tripulante nga nadakpan sa akto sang mga katapo sang kapulisan nga nagapatigayon sang dynamite fishing sa kalalawran nga sakop sang Barangay Banica, Roxas City.
Ginkilala ang mga nagkaladakapan nga sanday alyas “Nonoy”, alyas “RJ”, kag alyas “Mar”, yara sa legal nga pang-edaron kag lunsay mga residente sang nasambit nga lugar.
Narekober sa paghinakop sang mga ini ang isa ka longneck nga botelya nga naga-unod sang kemikal nga ginagamit sa improvised nga dinamita kag duha ka banyera nga may unod sang nagkalainlain nga sahi sang isda.
Sa interview sang Bombo Radyo kay PMAJ. Wilmar Bolivar, hepe sang Capiz Maritime Police Station, nakabaton sila sang report angut sa mga persona nga nagkaladakpan samtang nagapatigyaon sang pagpatrolya sa kalalawran.
Sa pagpangusisa sang mga otoridad sa mga suspetsado,ginpahayag sang mga ini nga tungod sa kapigaduhon kun ngaman nahimu nila ang kasubong nga buluhaton.
Nagtakop na ang ila reglementary period of detention rason nga ginhilway na ini sa karsel sang mga kapulisan.
Sa karon, natalana na nga pasakaan sang kaso sang Capiz Maritime Police Station ang mga nagkaladakpan nga paglapas sa RA 10654 Section 92 ukon Fishing Through Explosives, Noxious or Poisonous Substance, or Electricity kag Section 126 ukon Posessing, Dealing in or Disposing Illegally Caught or Taken Fish.
