ROXAS CITY – Nag-angkon sang pagpalanakit sa lawas ang tatlo ka mga panday matapos nga ginaalegar ginbanggaan kag ginsumbag sa Barangay Milibili, Roxas City.
Ginkilala ang mga biktima nga sanday Ronnel Binibini 27-anyos, Ronel Bajada 46-anyos kag Ariel Buhat 24-anyos nga lunsay mga resindete sang Barangay Candual, Panay, Capiz.
Base sa inisyal nga imbestigasyon sang Roxas City PNP nga nakabaton sila sang impormasyon nga may yara sang natabo nga kinagamo sa Barangay Milibili sa diin ginaalegar nga samtang pauli na kuntani ang tatlo ka mga biktima sa banwa sang Panay sang hinali na lamang nga ginbanggaan, ginsumbag kag ginsinggitan sang duha ka mga persona nga sanday Ruben Distura 64-anyos sang Barangay Tanque kag Angelour Atardo 43-anyos sang Barangay Milibili nga lunsay yara sa idalom sang impluwensya sang makahulubog nga ilimnon.
Bangud diri, gilayon naman nga gintawgan sang pulis agud respondehan ang nasambit nga insidente.
Samtang, ginaalegar naman sang mga ginareklamo nga sala ang mga akusasyon nga ginahaboy sang mga tagreklamo batuk sa ila.
