3 ka persona nga ginserbihan sang search warrant sang cidg; indi kilala sang mga opisyales sang brgy

ROXAS CITY – Indi kilala sang mga opisyales sang Barangay Sibaguan ang pagkakilanlan sang tatlo ka persona nga ginserbihan sang search warrant sang Criminal Investigation and Detection Group (CIDG) kahapon nga adlaw sa Happy Homes Subdivision, Brgy. Sibaguan , Roxas City.

Sa pakig-angut sang Bombo Radyo kay Punong Barangay Johnny Arciga ginsiling sini nga indi tumandok sang Sibaguan ang mga nagapuyo sa duha ka subdivision nga yara sa ila barangay rason nga indi sini kilala ang ginapahayag miyembro sang Komite Rehiyong Panay sa idalom sang CPP-NPA-NDF nga sanday Cirila Cordon Estrada alias “Cora” ukon “Sheila Gonzales”, Lenilyn Custorio Jaynos alias “Sandra” ukon “Elizabeth”, kag Marivie Bartolome Arguelles.

Suno kay kapitan, pila lamang ang kilala niya sa subdivision kag indi man gilayon nga makasulod sa compound apisar may yara sang complain letter nga kinahanglan idul-ong sa mga resipiyente.

Ginpahayag man sini nga wala sila sang ideya sa operasyon nga ginpatigayon sang CIDG.

Matandaan, nga nadakpan si Lenilyn Custorio Jaynos alias “Sandra” samtang at-large ang duha nga sanday Cirila Cordon Estrada alias “Cora” kag Marivie Bartolome Arguelles.

Magapangatubang ang mga ini sang kaso nga paglapas sa R.A 9516 ukon “Illegal Possession of Explosives” bangud sa nakuha sa lugar nga mga pampasigabong kag armas-luthang.

Sa pihak nga bahin, nagapangabay man si Arciga sa mga home owners sang amu nga subdivision nga magkooperar sa mga opisyales bilang residente sang nasambit nga lugar.