ROXAS CITY – Madugay na nga ginatiktikan sang mga kapulisan ang tatlo ka mga indibidwal nga nadakpan sa ginkasa nga drug buybust operation sang katapo sang Panay Municipal Police Station kaupod ang Capiz Police Provincial Drug Enforcement Unit (PPDEU) sang Capiz Police Provincial Office subong man ang Cluster SDET nga ginakabig-usan sang katapo sang Panitan Municipal Police Station, kag Maayon Municipal Police Station sa Barangay Tanza Sur, Panay, Capiz.
Matandaan ginkilala ang mga nagkaladakpan nga sanday Hermie Buenvinida, Alyas “Bani” 39-anyos residente sang Barangay San Jose, Roxas City, Norberto Balbona , 49-anyos, residente sang Brgy. 1, Roxas City, Capiz kag Famy Lipura, 25-anyos residente sang Tambak New Washington, Roxas City, Capiz.
Sa interview sang Bombo Radyo kay PCPT. Gary Diaz hepe sang Panay Municipal Police Station ginapahayag sini nga bangud wala sang trabaho sanday Buenvinida kag Lipura, posible nga nakatutok lamang ang mga ini sa iligal nga buluhaton kung sa diin nangin driver sa ila transaksyon si Balbona gamit ang tricycle nga wala sang prangkisa.
Suno kay Diaz, apisar indi sang palarehas ang address sang mga arestado posible nga may yara sila sang lugar nga ginakitaan kung sa diin didto magpatigayon sang amu nga buluhaton.
Mahibaluan nakuha sa posesyon sang mga nagkaladakpan ang 7 tanan ka sachet sang ginapatihan shabu nga may Standard Drug Price P68,000.00, P100.00 buybust money, P5,400.00 boodle money, 2 ka pouch nagaduag asul kag 2 ka sling bag, nagaduag brown.
Samtang, nagatimakas na sa karun ang Panay Municipal Police Station agud mapasakaan na sang nagakaigo nga kaso ang mga nadakpan.
