SIGMA, CAPIZ – Pilason ang tatlo ka mga persona matapos nga ginaalegar biktima sang hit and run sa Barangay Amaga, Sigma, Capiz.
Ginkilala ang mga biktima nga sanday Elvis Francisco, 29 anyos, Sabas Octoso, 29 anyos kag Dennis Francisco, 33 anyos nga lunsay mga residente sang Barangay Acbo sang amo nga banwa.
Base sa inisyal nga imbestigasyon sang Sigma Municipal Police Station nga magaliko na kuntani sa crossing Acbo ang motorsiklo nga ginasakyan sang mga biktima sang hinali na lamang sila nga ginbungguan sang isa ka pick up nga salakyan nga padulong naman sa dalanon sang segundo distrito.
Bangud diri, natumba ang motorsiklo kag madasig naman nga nagpalagyo ang driver sang salakyan.
Nag-angkon naman sang pilas sa magkatuhay nga parte sang lawas ang mga biktima nga gilayon naman gindala sa Mambusao District Hospital kag madasig naman nga gindapatan sang nagakaigo nga pagbulong.
Sa karon, padayon ang imbestigasyon nga ginapatigayon sang mga kapulisan agud matumod ang driver nga responsable sa nasambit nga insidente.
