ROXAS CITY – Padayon karon ang imbestigasyon sang mga kapulisan sa natabo nga pagpalupok sang armas luthang sa Barangay Binuntucan, Pontevedra, Capiz.
Base sa inisyal nga imbestigasyon sang Pontevedra Municipal Police Station nga samtang papuli na kuntani sanday Rommel Benliro 37-anyos sang Barangay Tuburan, Maayon kaupod sanday Jonel Alipante 32-anyos kag Jennifer Yllana 28-anyos nga lunsay mga residente sang Barangay Hipona, Pontevedra ginaalegar nga nakita nila ang tatlo ka wala matumod nga persona sa may katubuhan nga nagpalupok sang makaduha ka beses gamit ang wala matumod nga armas luthang.
Apang, narekober naman sa lugar ang duha ka basiyo sang caliber 9mm nga armas luthang nga amo ginapatihan ginamit sang mga suspek.
Nahibaluan nga nag-inom sa balay ni Junjun Biñas sanday Benliro antes natabo ang insidente kun sa diin maswerte naman nga wala sang may napilasan sa ila.
Samtang, nagaguwa sa imbestigasyon sang mga kapulisan nga hinubog ang motibo sa nagluntad nga insidente.
