ROXAS CITY – Yara karon sa kostodiya sang Puluy-an sang Pagpalangga, isa ka crisis center sang Department of Social Welfare and Development sa syudad sang Roxas ang tatlo ka mga solterito nga ginatudlo responsable sa pagmotornap sang isa ka motorsiklo kag tricycle sang isa ka pulis, matapos ang follow-up operation sang Roxas City PNP.
Sa interview ng Bombo Radyo kay Superintendent Kim Legada, OIC sang Roxas City Police Station, ginpahayag sini nga gindala kag ginprenda nanday alyas Gian, Louie kag Kent lunsay 15-anyos kag mga estudyante, ang motorsiklo ni Samuel Palmares sang Dao, Capiz sa Sityo Cudian, Barangay Tuburan, Maayon.
Matapos nabalik sa tag-iya ang motorsiklo gilayon nagpatigayon ang mga pulis sang follow-up operation sa nadula nga tricycle ni PO1 Edenson Hari-on sang Barangay 1, Roxas City matapos may nakahatag sang impormasyon nga ginbilin ini sang mga lamharon nga suspek malapit sa 24 hour store.
Suno kay Legada nga ginapreparar naman sini ang pila ka mga kinahanglanon nga dokumento para sa pagpasaka sang panumbungon batuk sa nasambit nga mag suspek.
Samtang ginatutukan sa karon sang mga pulis ang nahinabo nga krimen, bangud kadam-an sa mga nadalahig diriang mga menor de edad.
