ROXAS CITY — Ginpanginbulahan ni Board Member Jonathan Besa ang ginhimo sang Department of Environment and Natural Resources pinaagi kay Environment Sec. Gina Lopez nga pagpakanselar sa mga Mineral Production Sharing Agreements (MPSAs) sang mga minahan nga sakop sang ila mga operasyon ang mga watershed areas.
Mahibaluan nga isa sa mga mining firm nga ginapakanselar sang DENR ang MPSA amo ang iya sang Parvisgold Inc., ukon ang anay Quarry Ventures Phils., Inc., nga nagasakop sa pila ka mga barangay sa banwa sang Pontevedra, President Roxas kag Maayon.
Ginpahayag ni Besa sa iya privileged speech sa sesyon sang Capiz provincial board nga nagakadapat nila nga pamatukan ang pagmina sa probinsiya bangud isa ka watershed area ang Panay River.
Diri sa Panay River suno kay Besa ginakuha sang mga Capizeño ang tubig nga ilimnon, suplay sang tubig sa mga irigasyon sa mga ulumhan kag kabahin sang ecosystem nga ginahalinan sang manggaranon nga marine kag aqua products.
Nagapabor man si Besa sa obserbasyon sang tiglikom sang DENR nga nagapabilin sa gihapon nga pila sa pinakapigado nga mga probinsiya sa pungsod ang kaprobinsiyahanan kun sa diin may yara sang large scale mining activities.
Ginakalipay man niya ang pagkansela sang MPSA sang isa ka kumpanya nga nagaplano magmina sa kabukiran sang Capiz kag dungan man sini, nagpangabay si Besa sa iya mga kaupdanan sa sangguniang panlalawigan nga ikunsiderar liwat ang ila panindugan nga nagasuporta sa pagpatigayon sang large scale mining operations bangud sa ila pagpati nga ini ang magadala sang kaayuhan sa probinsiya.
