PANAY, CAPIZ – Arestado ang tatlo ka mga indibidwal sang mga katapo sang Panay Municipal Police Station matapos nadakpan nga nagapatigayon sang ilegal nga pagpataya sang ‘daily double’ sa banwa sang Panay.
Ini ang ginpahayag sang hepe sang Panay PNP nga si Police Captain Marvin Balmes sang mainterview sang Bombo Radyo Roxas.
Ginkilala ang mga nadakpan nga sanday Richard Vista, 45 anyos, Juan Briones, 63 anyos kag John Besiño, 32 anyos, lunsay mga residente sang nasambit man nga banwa.
Suno kay Balmes nga sanday Vista kag Briones ang subject sang mga kapulisan sa ila nga operasyon apang kaupod sang mga suspek si Besiño sang nagapatigayon ang mga ini sang ila ilegal nga aktibidad.
Narekober pa sa posisyon ni Vista ang isa ka calibre .45 nga armas luthang nga may magazine kag loaded sang anom ka mga bala, kag isa pa ka magazine nga may anom pa gid ka mga bala.
Suno kay Balmes nga madugay na sa ila ilegal nga aktibidad sanday Vista kag Briones kag halos isa ka bulan nila gin-monitor ang duha antes ginkasa ang ila operasyon.
Sa karon yara na sa kustodiya sang Panay Municipal Police Station ang mga suspek kag natalana nga pasakaan sang nagakaigo nga panumbungon.
