ROXAS CITY – Padayon nga ginabulong sa ospital ang tatlo ka mga persona matapos nga ginaalegar nagbunggo ang ginasakyan nga truck sa puno sang acasia sa Crossing Talaba, Barangay Maninang, Sapian, Capiz.
Ginkilala ang mga napilasan nga mga biktima nga sanday Dominggo Vargas 40-anyos sang Barangay Balucuan, driver sang truck kag duha ka mga pahinante nga sanday Jaylord Aswer 24-anyos kag Henry Agbas 20-anyos nga lunsay mga residente sang Barangay Nasunugan, Dao, Capiz.
Base sa inisyal nga imbestigasyon sang Sapian Municipal Police Station nga samtang ginamaneho ni Vargas ang dalanon aksidente na lamang ini nga nadulaan sang kontrol sa pagmaneho rason nga bumunggo ini sa puno sang acasia.
Suno kay Punong Barangay Gregorio Lavanza Jr., gikan sa banwa sang Dao ang truck nga may unod nga 530 ka mga sako sang bugas kag igadeliver kuntani ini sa Kalibo sang nagluntad ang aksidente.
Bangud diri, nag-angkon sang mga pilas ang tatlo ka mga biktima nga gilayon naman nga gindapatan sang pagbulong sa Mambusao District Hospital.
