ROXAS CITY – Pilason ang tatlo ka persona matapos nagbunggu-anay ang isa ka tricycle kag motorsiklo sa national road sa Brgy. Pob. Ilaya banwa sang Panitan.
Ginkilala ang mga pilason kag sakay sang tricycle nga sanday Nestor Dollete, 54-anyos, kag isa ka menor de edad nga lunsay residente sang Brgy. Tabuc banwa sang Panitan.
Samtang, ginkilala naman ang driver sang motorsiklo nga si Cole Bryan Develos, 22-anyos, estudyante kag residente sang Brgy. Tico banwa sang Panay.
Sandig sa imbestigasyon sang Panitan Municipal Police Station, ginasubay sang driver sang tricycle ang dalan nagikan sa Panitan public market kag padulong kuntani sa syudad sang Roxas agud magpangumpra sang inugbaligya nga isda.
Ginapahayag, nga malayo palang nakita na sang driver sang tricycle nga sala na nga linya ang ginasubay ni Develos gani naghinay-hinay ini kag naglikaw.
Apang, aksidente sa gihapon ini nga bumunggo sa sidewheel sang amu nga tricycle.
Lunsay nag-angkon sang kapilasan sa magkatuhay nga parte sang ila kalawasan ang nasambit nga mga persona nga madasig naman nga ginrespondehan sang Panitan rescue team kag gindapatan sang pauna nga pagbulong.
Nahibaluan nga yara sa impluwensya sang makahulubog nga ilimnon si Develos.
Ginkustodiya naman sang Panitan PNP ang mga nalakip nga behikulo sa nagluntad nga insidente samtang natalana naman nga magahusay ang magtimbang nga kampo.
