ROXAS CITY – Pilason ang tatlo ka mga persona, matapos ginapahayag ginbungguan sang topdown nga tricycle sa Barangay Rosario, Pilar, Capiz takna alas 5:10 sang hapon kahapon Setyembre 20, 2023.
Ginkilala ang mga biktima nga sanday Rodrigo Lachica 58-anyos driver sang Suzuki Smash, mga sakay sini nga si Veronica Vergara 65-anyos kag isa ka menor de edad nga lunsay residente sang Barangay Cayus, Pilar Capiz.
Samtang ang driver naman sang top down nga tricycle ang ginkilala kay Nike Labitag 34-anyos laborer kag residente sang Barangay Dulangan Pilar, Capiz.
Sa impormasyon nga nakuha sang Bombo Radyo sa Pilar Municipal Police Station, ginapahayag nga samtang ginasubay sang mga biktima ang dalan sa nasambit nga lugar hinali na lamang nga ginbungguan sang top down nga tricycle ang likod sini.
Bangud sa impact, nag-angkon sang mga minor nga pilas ang mga biktima nga madasig naman ginrespondihan sang Pilar Municipal Disaster Risk Reduction and Management Office (MDRRMO) para sa nagakaigo nga pagbulong.
Samtang ang suspek nga nagtuyo pa kun tani nga magpalagyo, yara na sa karun sa kustodiya sang Pilar Municipal Police Station para sa nagakaigo nga disposisyon.
