PILAR, CAPIZ – Pilason ang tatlo ka mga persona matapos nga ginaalegar na-sideswiped sang isa ka tricycle ang isa ka motorsiklo sa Barangay Cayos, Pilar, Capiz.
Ginkilala ang mga biktima nga sanday Daniel Dela Torre, 30 anyos (driver sang motorsiklo) kag backrider sini nga si Sheila Anastacio, 24 anyos nga lunsay residente sang Barangay Manuling, President Roxas, Capiz.
Suno kay Police Master Sergeant Elmer Balgos, imbestigador sang Pilar Municipal Police Station nga samtang naggikan sa banwa sang Panay kag padulong na kuntani sa Batad, Iloilo ang tricycle nga ginamaneho ni Nieril Badong, 52 anyos kag residente sang isa ka barangay sa banwa sang Batad, Iloilo sa diin pag-abot sa national road sang Barangay Cayos, Pilar, Capiz aksidente sini nga na-sideswiped ang motorsiklo nga ginamaneho ni Dela Torre.
Bangud diri, nag-angkon man sang pilas ang pasahero sang tricycle nga si Analyn Pradilla, 42 anyos kag residente sang isa ka barangay sa banwa sang Batad, Iloilo.
Gilayon naman nga gindala sa magkatuhay nga mga ospital ang mga biktima agud dapatan sang nagakaigo nga pagbulong.
