ROXAS CITY – Pilason ang tatlo ka mga persona matapos nga nagbaliskad ang ginasakyan nga Ford Everest nga salakyan nga nagaduag sang puti sa kauyaparan sa Barangay Atiplo, Mambusao, Capiz.
Ginkilala ang driver sang amo nga salakyan nga si Rufo Adrid Dela Cruz 34-anyos sang Calipayan, Roxas City.
Samtang, ang duha ka mga pasahero naman amo sanday Arjay Pedrosa Canales, 22-anyos tumandok sang Subangdaku, Mandaue City, Cebu kag Adonis Limosnero Fernandez, 33-anyos nga lunsay mga residente sang Arnaldo Boulevard sining siyudad.
Base sa inisyal nga imbestigasyon sang Mambusao Municipal Polie Station nga samtang ginasubay sang mga biktima ang dalanon padulong sa siyudad sang Roxas sang aksidente na lamang nga naglapaw sa gutter ang amo nga salakyan rason nga nadulaan sang kontrol sa pagmaneho ang nasambitan nga driver.
Bangud diri, nagdiretsu ang salakyan sa uyapad rason nga nag-angkon sang mga kasamaran ang mga biktima nga gilayon naman gindala sa Mambusao District Hospital para dapatan sang nagakaigo nga pagbulong.
Nagapadayon naman ang imbestigasyon sang mga kapulisan sa nagluntad nga aksidente.
