ROXAS CITY – Nagbaliskad sa tunga sang katubuhan ang isa ka salakyan nga kalakip sa convoy sang alkalde sang banwa sang President Roxas, Capiz matapos naglupok ang isa ka goma sang Montero sport.
Suno kay Mayor Receliste Escolin sakay sang nasambit nga salakyan ang tatlo ka mga tawo nga kalakip sa iya nga convoy nga kaupod sini kuntani nga magapadulong sa New Washington, Aklan para sa isa ka orientation sang People’s National Movement for Federalism (PENAMFED).
Ginkatingala lamang sang alkalde nga nakasakay sa nauna nga salakyan nga wala na nagasunod ang Montero Sport, gani sang ila balikan nakita nila nga nagbaliskad na ini sa tunga sang katubuhan.
Ginpasalamat na lamang sang opisyal, bangud lunsay mga bagras kag menor nga kapilasan ang naangkon sang tatlo ka mga tinawo nga nakasakay sa nagbaliskad nga salakyan.
Nagapati si Escolin nga ang sobra nga hangin sa goma kag ang madasig nga pagpadalagan sang salakyan ang rason sang pagbaliskad sini.
