ROXAS CITY – Pilason ang tatlo ka mga indibidwal matapos nga nagbungguanay ang duha ka mga motorsiklo sa Barangay Bonga, Panay, Capiz.
Ginkilala ang mga napilasan nga sanday Philip Lasanas 33-anyos, driver sang Rusi nga motorsiklo kag ang wala na ginhingadlan nga asawa sini nga lunsay mga residente sang Barangay Poblacion Tabuc kag Alvin Billan 30-anyos residente sang Barangay Pawa, sang amo man nga banwa.
Sandig sa inisyal nga imbestigasyon sang Panay Municipal Police Station nga samtang ginasubay ni Lasanas ang dalan hinali na lamang nga nagliko pa-wala ang ginamaneho sini nga motorsiklo kag aksidente nga bumunggo sa kasugata nga motorsiklo nga ginamaneho ni Billan sakay ang duha ka mga backriders nga sanday Wilnie Dapiton kag Mark Dumaniel.
Bangud sa insidente nag-angkon sang pilas sa magkatuhay nga porsyon sang kalawasan si Lasanas kag iya nga asawa nga lunsay gindala sa Capiz Emergency Response Team (CERT) sa Bailan District Hospital.
Nag-angkon naman sang pilas sa magkatuhay nga porsyon sang lawas si Billan apang nagpamalibad naman ini nga dal-on sa ospital.
Maswerte naman nga wala napilasan ang duha ka mga backrider ni Billan.
Padayon naman ang imbestigasyon sang mga kapulisan sa nagluntad nga aksidente.
