ROXAS CITY – Nabutang sa kontrobersiya ang tatlo ka mga miyembro sang Sapian Municipal Police Station matapos ginreklamo sang isa ka ginang sang pagpanakit sa iya nga mister.
Sa interview sang Bombo Radyo kay Mrs. Anjovelyn Diestro, 51-anyos sang Barangay Damayan, Sapian, Capiz, nagpangayo ini sang responde sa mga pulis bangud hubog ang mister nga si Jolito Diestro kag ginaguba ang mga gamit sa ila balay.
Gilayon nga nagresponde si Police Master Sergeant Allan Occeño kag duha ka mga kaupdanan sini kag ila gin-estorya si Jolito nga mag-upod sa ila.
Suno sa ginang nga nakita sini nga ginsumbag kag ginsipa ni Occeño ang iya nga mister matapos nagpakatig-a nga mag-upod sa mga pulis sa presinto.
Yara na sa sulod sang WCPD si Mrs. Diestro samtang yara sa guwa sang talatapan ang mister sang makita sini nga ginsipa kag ginsumbag ni Police officer Occeño.
Wala pa nakuntento si Occeño kag ginpulihan sini nga sumbagon sang kaupod nga pulis si Jolito rason nga nagpangayo sang bulig ang ginang sa iban nga pulis.
Bangud sa natabo naglain ang pamatyag sang mister kag gilayon gindala sa ospital para mapabulong ang nabatyagan kag ang naangkon nga kasamaran.
