ROXAS CITY – Ginkumpirma sang Traffic Management Unit head nga tatlo ka mga traffic auxiliaries ang ginsipa sa serbisyo matapos napamatud-an nga nagpangilkil sa mga drivers nga ila ginadakup.
Sa interview sang Bombo Radyo Roxas kay Junie Jun Hervias, ginpahayag sini nga napamatud-an sa ginpatigayon nga imbestigasyon nga nagpangilkil ang tatlo ka mga auxiliaries nga sanday Kenneth Andrade, Bernie Abelarde kag Samuel Estandarte sa mga drivers nga ila madakpan nga nagalapas sa traffic rules.
Ginhalimbawa ni Hervias ang pagdakup nanday Andrade kag Abelarde sa tricycle driver nga gikan sa banwa sang Pontevedra nga naglapas sa ordinansa sang Roxas City apang sa baylo nga isyuhan sang citation ticket para magbayad sang multa sa city treasurer’s office direkta nila nga ginkuha ang P800.00 sa driver.
Napamatud-an man ang pagpangilkil ni Estandarte sa ambulance driver nga gikan sa banwa sang Pilar, Capiz sa diin P500 ang nakuha niya diri.
Bangud diri, gnpahanumdum ni Hervias ang mga traffic auxiliaries nga likawan nga maghimo sang mga anomaliya sa trabaho kasubong sang pagpangilkil bangud bisan san-o wala niya ini ginakunsinti kag indi siya magpangduha duha nga pahalinon sila sa trabaho.
