Tatlo ka weather system ang padayon nga magaapekto sa pungsod, ang shear line, easterlies, kag northeast monsoon ukon amihan.
Suno sa Weather Bureau Specialist sang Philippine Atmospheric Geophysical and Astronomical Services Administration (PAGASA), ang pagtingub sang mainit kag malamig nga hangin ukon shear line ang nagatuga sang mga lapta-lapta nga pag-ulan kag isolated thunderstorms sa mga rehiyon sang Bicol, MIRAROPA (Mindoro, Marinduque, Romblon at Palawan), Eastern Visayas, kag Quezon province.
Ang easterlies ukon hangin nga nagikan sa sidlangan nga nagaagi sa kadagatan sang pasipiko nga nagadala sang mainit nga tyempo ang ginalauman nga magaapekto man sa mga rehiyon sang Caraga, Davao, Sarangani, kag South Cotabato kun sa diin mabatyagan ang magal-umon nga kalangitan.
Magatuga man sang mga isolated nga pagbuhos sang ulan ukon thunderstorms ang mabatyagan sa iban nga parte sang Visayas kag Mindanao sa sulod sang 24 oras.
Samtang, ang northeast monsoon ang padayon nga magaapekto sa Metro Manila kag sa iban pa nga parte sang Luzon kun sa diin lauman ang mulugal-umon tubtob sa magal-umon nga kalangitan.
Ang Cagayan Valley, Cordillera Administrative Region, kag Aurora ang makabatyag man sang magal-umon nga kalangitan kag mga pag-ulan nga tuga sang northeast monsoon.
