ROXAS CITY – Dead on arrival ang isa ka lalaki, matapos ginapahayag nga naaksidente samtang nagamaneho sang motorsiklo sa Arnaldo Boulevard Barangay Baybay, Roxas City.
Ginkilala ang napatay nga si Amiel Jun Dadula kag residente sang New Road Barangay Banica, sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang ginasubay ni Dadula ang dalan nagikan sa Roxas City Proper kag padulong kun tani sa Barangay Baybay sakay sang motorsiklo sini nga Yamaha Mio nagaduag green/black, apang pag-abot sa lugar kung sa diin ginluntaran sang insidente aksidente ini nga bumunggo sa concrete center island rason nga nadulaan ini sang kontrol sa pagmaneho nga nagresulta sang iya pagkatumba.
Bangud sa mabaskog nga impact, nag-angkon sang patal nga pilas sa nawong kag nagkalain-lain nga parte sang lawas ang biktima nga madasig naman ginpadangat sa Roxas Memorial Provincial Hospital para sa nagakaigo nga pagbulong apang gindeklarar ini nga dead on arrival sang doctor.
Sa karun, yara na sa paghinakop sang Roxas City PNP ang amu nga motorsiklo para sa nagakaigo nga pagbulong.
