30 anyos nga lalaki pilason matapos bumunggo ang motorsiklo sa trak sa Sigma

MIANAY, SIGMA – Pilason ang 30 anyos nga lalaki matapos bumunggo ang ginamaneho sini nga motorsiklo sa isa ka trak sa Barangay Mianay, Sigma, Capiz.

Ginkilala ang biktima nga si Jason Lara, residente sang Barangay Guintas sang nasambit man nga banwa.

Base sa inisyal nga imbestigasyon, pauli na kuntani ang biktima sakay sa iya nga motorsiklo apang pag-abot sa kurbadahon nga porsyon sang karsada sa nasambit nga lugar, bumunggo ini sa trak nga ginamaneho ni Allan Permato, 44 anyos sang Barangay Dayao, Roxas City.

Bangud diri, nag-angkon sang mga kasamaran sa lawas ang biktima nga gilayon ginpadangat sa ospital agud madapatan sang nagakaigo nga pagbulong.