ROXAS CITY – Pilason ang isa ka persona matapos nga ginaalegar nadaplisan sang kutsilyo sang kaugalingon nga pakaisa sa Barangay Ondoy, Ivisan, Capiz.
Ginkilala ang biktima nga si Benjie Vasquez 30-anyos sang nasambit nga lugar.
Base sa inisyal nga imbestigayon sang Ivisan Municipal Police Station nga samtang nagainom ang duha sa balay sang suspek hinali na lamang nga nag-angkon sang indi pag-intiendihanay sa tunga sang biktima kag suspek nga si Jolland Vasquez sang amo man nga lugar rason nga hinali na lamang ini nga nagkuha sang kutsilyo kag gindaplisan ang biktima.
Bangud diri, nag-angkon sang pilas si Benjie apang nagpamalibad naman ini nga dal-on sa ospital.
Nahibaluan nga yara sa idalom sang impluwensya sang makahulubog nga ilimnon ang duha.
Samtang, boluntaryo naman nga nagsungka ang suspek sa mga pulis matapos ang insidente.
