ROXAS CITY –Pilason ang 30-anyos nga persona matapos nga ginaalegar ginlabo sa Barangay Lonoy, Sapian, Capiz.
Ginkilala ang biktima nga si Sonny Boy De Juan sang nasambit nga lugar.
Sandig sa inisyal nga imbestigasyon sang Sapian PNP nga samtang nagalakat ang biktima sa karsada kag yara sa idalom sang impluwensya sang makahulubog nga ilimnon sang ginaalegar nga hinali na lamang ini ginpalapitan kag ginlabo sang suspek nga si alias Oding Leccio 30-anyos sang amo man nga lugar.
Bangud diri, nag-angkon sang pilas sa nawala nga guya ang biktima nga gilayon naman gindala sa ospital agud dapatan sang nagakaigo nga pagbulong.
Daan nga hiligut-anon naman ang motibo sang suspek sa paglabo sa biktima.
Samtang, padayon naman ang hot pursuit operation sang mga kapulisan agud makita ang suspek nga madasig naman nagpalagyo matapos ang nasambit nga krimen.
