Posible nga maglab-ot sa $30 Billion ang magasulod nga investment sa sektor sang digital kag artificial intelligence (AI) sa Pilipinas sa idalom sang Philippines AI+ Infrastructure Masterplan (PAIIM) 2033, suno sa Department of Information and Communications Technology (DICT).
Suno kay Department of Information and Communications Technology Henry Aguda, target sang gobyerno nga makatukod sang 1.5 gigawatts sang AI-ready data center capacity agud suportahan ang padayon nga pag-uswag sang digital economy sang pungsod.
Tinutuyo sang Philippines AI+ Infrastructure Masterplan (PAIIM)2033 nga pabaskugon ang AI kag digital infrastructure kag himuon nga regional hub ang Pilipinas para sa artificial intelligence kag innovation.
Samtang, ginalauman nga maaprubahan sang Economy and Development Council ang nasambit nga masterplan sa bulan sang Hulyo matapos ini ma-endorso sa lebel sang Infrastructure Committee.
