ROXAS CITY –Nagalab-ot sa halos 30 ka mga trabahador sa isla sang Boracay ang nagpanawagan sang bulig sa Bombo Radyo agud makapauli sa probinsiya sang Capiz.
Ini matapos nga naabut-abutan sila sang lockdown sa isla kadungan sang Enhanced Community Quarantine bangud sa coronavirus disease (COVID-19) pandemic.
Suno kay Jamela Aranton, batyag na nila ang tuman ka budlay nga sitwasyon ilabi na nga wala sila sang trabaho kasunod sang pagsarado sang mga hotels kag establisyemento sa isla.
Suno diri nga wala sila sang iban nga handom kundi ang makapauli sa probinsiya bangud wala man sila sang iban nga palangitan-an sa lugar.
Ginpahayag sini nga ginpasalig man sila sang lokal nga gobyerno sang siyudad sang Roxas nga pagabuligan apang indi pa sini mapat-od kun pinansiyal ini nga bulig ukon relief packs.
Nagalaum ini nga pinaagi sa Bombo Radyo mapalab-ot sa natungdan ang ila nga sitwasyon kag gilayon ini mahatagan sang solusyon.
