Naglab-ot na sa 300 ka mga super health center ang gina-imbestigaran sang Department of Health matapos matukiban nga tapos na ang konstruksyon apang nagapabilin sa gihapon nga “non-operational.”
Ginkumpirma ini ni DOH Secretary Ted Herbosa kag ginpahayag nga kabahin ini sang case building sang ahensya kasunod sang mga reports tuhoy sa mga wala magamit nga mga pasilidad.
Suno kay Sec. Herbosa, nagapakig-angot na ang DOH sa Independent Commission for Infrastructure sa imbestigasyon sa mga health center.
Lakip man sa mga masunod nga tikang amo ang pag-activate sang Citizens Participatory Audit agud makabaton pa sang mga report halin sa publiko may kaangtanan sa mga naka-standby lang ukon wala mapuslan nga mga super health center.
Nahibaluan nga ginpatawag si Herbosa sang Independent Commission for Infrastructure sa diin nagpasalig ang natungdan nga handa ini nga ipasa ang tanan nga impormasyon nahanungod sa mga gina-imbestigaran nga health centers sa pungsod.
