DAYAO ROXAS CITY – Naglab-ot sa 300 nga pamilya sa Barangay Dayao, Roxas City ang apektado sang pagbinaha dala sa gihapon sang pagpanglaslas ni Bagyong Kristine.
Sa interview sang Bombo Radyo kay Punong Barangay Wennie Batuampo, ginpahayag sini nga ang nasambit nga numero ang mga pumuluyo sang Sitio Pagutok kung sa diin tuman nga naapektuhan sang tubig-baha bangud wala sang malapsan ang tubig sumugod nga ginsaraduhan kag gintambakan ang drainage system.
Suno kay PB Batuampo, naglab-ot sa duha ka semana antes nag-amat-amat nga nagnubo ang tubig baha sa lugar.
Mahibaluan nga sumugod sadtong Martes ginbaha na ang Purok I apang nagdugay lamang ini sang isa ka gab-i bangud nahimuan sini nila sang paagi nga makay-o ang drainage.
Sa pihak sini, maswerte nga wala sang pamilya sa amu nga barangay ang nag-evacuate dala sang pagbaha sa ila lugar apang ginpasiguro sang Punong Barangay nga bukas ang ila Barangay Hall kag eskwelahan bilang evacuation area pananglitan nga may yara sang mga pumuluyo nga luyag mag-evacuate.
Samtang, nagpalab-ot naman sang mga foodpacks ang alkalde sang syudad sa mga apektado kung sa diin 260 nga mga pamilya ang natigayon nga mahatagan.
