Makabaton sang P3 billion nga fuel subsidy subong nga bulan ang ginabulubanta 300,000 ka mga mangunguma, mangingisda kag truck drivers nga nagadul-ong sang agricultural products sa idalum sang UPLIFT program sang gobyerno.
Ini ang ginpahayag sang Malacañang kasunod sang report ni Agriculture Undersecretary Arrey Perez nga kabahin sang bulig sang gobyerno agud mapahagan-hagan ang epekto sang El Niño kag mataas nga presyo sang langis sa sektor sang agrikultura.
Ang mga mangunguma kag mangingisda makabaton sang P5,000 nga one-time fuel subsidy para sa paggamit sang mga tractors, motorized bancas kag iban pa nga kagamitan nga nagakinahanglan sang gatong.
Samtang P2,000 kada semana ang fuel subsidy para sa mga delivery truck drivers nga nagadul-ong sang agricultural products sa Metro Manila kag iban pa nga mga merkado.
Nagapakig-angot subong ang Department of Agriculture sa Land Bank of the Philippines agud mapadasig ang pagpanagtag sang ayuda pinaagi sa branch kag ATM.
Ginatun-an man sang Toll Regulatory Board kag mga tollway operators ang toll holiday ukon discount sa mga agri-delivery truck tubtob Disyembre 31.
Suno kay Perez, nagalaum ang DA nga makaangkon sang kasugtanan sa mga tollway operators sa indi madugay agud ipatuman ang toll relief subong nga bulan.
