ROXAS CITY -Arestado ang isa ka 31 anyos nga lalaki matapos nadakpan sa ginpatigayon nga drug buybust operation sang Philippine Drug Enforcement Agency (PDEA-Capiz) kag Station Drug Enforcement Team sang Roxas City Police Station sa Barangay Barra, Roxas City.
Ginkilala ang nadakpan nga si Antonio Cerujano Jr., 31 anyos, residente sang Sitio Tabai, sang nasambit man nga barangay.
Narekober sa suspek ang 7 ka sachets sang shabu nga ginabulubanta nagabalor sang P400, 000, P500 nga buybust money kag cellphone.
Sa interview sang Bombo Radyo kay Police Master Sergeant Ramil Arcangeles, tagpamaba sang Roxas City PNP, ginpahayag sini nga drug surrenderee sang Barangay Barra si Cerujano.
Suno sa opisyal nga sadtong tuig 2018 sang natapos pa sang drug suspek ang Community Based Drug Rehabilitation Program apang sa baylo nga magbag-o, nagbalik ini sa iya ilegal nga buluhaton.
Sa karon, nakaaresto na ang suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
