ROXAS CITY – Pilason ang 31-anyos nga lalaki matapos nga ginaalegar ginluthang sang iya nakaupod hampang sa isa ka bilasyunan sa banwa sang Panit-an, Capiz.
Ginkikala ang biktima nga si Arjen Deita, consrruction worker kag residente sang Barangay Ambilay sang amo nga banwa.
Sandig sa inisyal nga imbestigasyon ni Police Staff Sergeant Manuel Kenneth Anisco sang Panitan PNP samtang nagahampang ang biktima kaupod ang wala matumod nga mga suspek sang hinali na lamang nga nag-angkon sang komusyon.
Nahibaluan nga nagdesisyon ang biktima nga magpauli apang ginaalegar nga gintambangan ini sang anom ka mga persona nga nakaupod sini sa bilasyunan kag ginluthang.
Bangud diri, nag-angkon sang pilas sa natuo nga butkon ang biktima nga gilayon naman nga gindala sa ospital kag padayon sa karon nga ginabulong.
Samtang, ginpahayag sang biktima nga posible nga taga-Barangay Sinabsaban, Cuartero ang mga suspek nga nagluthang sa iya.
Padayon naman ang imbestigasyon sang mga kapulisan sa nagluntad nga insidente.
