31 ka mga insidente sang sunog, na-record sang BFP-Roxas City halin sang Enero tubtob Septyembre 2026; Balor sang danyos naglab-ot sa masobra P2million

Naglab-ot sa P2,669,850 ang balor sang danyos bangod sa 31 ka mga insidente sang sunog nga na-record sa Roxas City halin sang Enero tubtob Septyembre 2026.

Sa interview sang Bombo Radyo kay SFO2 Sussie May Magan, Public Information Officer sang Roxas City Fire Station, iya ginpahayag nga sa amo nga numero nagnubo ini kumpara sa 39 ka mga insidente sang sunog nga na-record sang nagligad nga tuig.

Suno kay Magan, mas madamo ang nagakatabo nga sunog halin Marso tubtob Agosto bangod sa tuman nga kainit sang panahon.

Nagpahanumdom naman ang Bureau of Fire Protection sa publiko nga patyon kag siguruhon nga naka-secure ang mga appliances antes maghalin sang ila tagsa ka mga puluy-an.