Nagbaton sang ila Special Risk Allowance (SRA) ang 3,116 ka Barangay Health Workers (BHWs), Barangay Nutrition Scholars (BNSs), kag Barangay Service Point Officers (BSPOs) nga halin sa mga kabanwahanan sang Segundo Distrito sang Capiz.
Ginpatigayon ang payout sang SRA kahapon, Mayo 29, sa Capiz Gymnasium sa Villarreal Stadium sa Roxas City nga gintambongan sang mga opisyal sang provincial Government kag local Government.
Suno sa Provincial Government of Capiz, kabahin ini sang padayon nga tikang sang administrasyon ni Gobernador Fredenil H. Castro sa paghatag pagkilala kag suporta sa mga health volunteers nga nagaserbisyo sa mga komunidad.
Ginkilala man ang importante nga papel sang mga BHWs, BNSs kag BSPOs bilang mga frontliners sa pag-atipan sang ikaayong lawas kag kaayuhan sang mga pumuluyo, labi na sa tion sang mga emerhensya kag krisis medikal.
Nag-upod sa programa ang mga katapo sang Provincial Health Office sa pagpanguna ni Dr. Ramon Alex T. Nolasco, kaupod sanday Provincial Administrator Atty. Arthur Biñas, Provincial Treasurer Diosdado Llamas, kag Local Economic Development and Investment Promotions Officer Rio Garcia.
Nagtambong man sa aktibidad si Vice Governor James Magbanua, mga miyembro sang Sangguniang Panlalawigan, kag mga alkalde kag bise-alkalde sang mga kabanwahanan nga sakop sang Segundo Distrito bilang pagpakita sang suporta sa mga health volunteers sang probinsya.
