Nadakpan ang 318 ka traffic violators sa tatlo ka adlaw nga operasyon sang Land Transportation Office Region 6 sa Roxas City batok sa mga nagalapas sa traffic kag transportation laws.
Sa interview sang Bombo Radyo kay Atty. Gaudioso Geduspan, Regional Director sang LTO Region 6, iya ginpahayag nga, ginpatigayon ang operasyon halin Mayo 13 tubtob 15 kun sa diin nagpatigayon sang surveillance, monitoring kag intelligence operations ang mga enforcers batok sa mga wala rehistro nga salakyan, mga colorum operators kag iban pa nga violators.
Suno kay Geduspan, padayon nila nga ginapalig-on ang koordinasyon sa mga local government units sa Western Visayas agud mas mapabaskog ang kampanya kontra sa mga traffic violators.
Nagpanawagan ang natungdan sa publiko nga siguraduhon nga updated ang vehicle registration kag driver’s license agud malikawan ang penalidad kag posible nga pagdakop sa masunod nga mga operasyon.
