WESTERN VISAYAS – Nagsumpa sa serbisyo ang 319 ka bag-o nga police recruits sang Police Regional Office 6 ukon PRO6 sang Setyembre 16, 2026, matapos makompleto ang recruitment kag selection process sang Philippine National Police.
Sa interview sang Bombo Radyo kay Police Major Lailyn Sencil, Spokesperson sang Police Regional Office 6 “PRO6”, iya ginpahayag nga ang 319 ka bag-o nga police personnel amo ang nakalab-ot kag nakompleto ang nagkalain-lain nga proseso antes sila pormal nga magsumpa sa serbisyo.
Suno kay Sencil, 275 sa mga bag-o nga police recruits ang lalaki, kag 44 naman ang babayi; lakip sa napilian sa Rergular Recruitment Program ang 94, samtang 225 naman ang napilian sa Attrition Recruitment Program.
Pahayag pa niya, sa pagpanguna ni Police Brigadier General Randulf T. Tuaño, Regional Director sang PRO6, ang oath-taking ceremony ginbuylugan sang Regional Screening Committee.
Dugang pa sang natungdan, ginpahanumdom ni Tuaño ang mga bag-o nga police pertconnel nga indi nila dapat pagkalimtan ang mga kabudlay kag sakripisyo nga ila naagyan agud malab-ot ang handum nga makaserbisyo.
Ginpahayag man nga pagaidalumon ang mga bag-o nga police recruits sa anum ka bulan nga Basic Recruit Course bilang kabahin sang ila training antes sila bug-os nga makaserbisyo bilang mga police personnel.
Sa karon, ginapa-abot sa mga bag-o nga police recruits ang seryoso nga pag-atipan kag paghanas sa ila basic training agud mangin handa sila sa mga responsibilidad kag obligasyon bilang mga miyembro sang Philippine National Police.
