Nagsumpa na sa serbisyo ang 319 ka bag-o nga police recruits sang Police Regional Office 6 ukon PRO-6 matapos makumpleto ang recruitment kag selection process sang Philippine National Police ukon PNP.
Sa interview sang Bombo Radyo kay Police Major Lailyn Sencil, spokesperson sang PRO-6, iya ginpahayag nga 275 sa mga recruits ang lalaki kag 44 ang babayi.
Sa kabug-usan nga numero, 94 ang napili sa Regular Recruitment Program, samtang 225 naman ang napili sa Attrition Recruitment Program.
Suno kay Sencil, ginpahanumdom sa mga bag-o nga recruits nga indi pagkalimtan ang mga kabudlayan kag sakripisyo nga ila naagyan para malab-ot ang handum nga makaserbisyo sa kapulisan.
Ginalauman naman sang natungdan nga seryosohon sang mga recruits ang ila basic training agud mangin handa sa mga responsibilidad kag obligasyon bilang mga miyembro sang Philippine National Police.
