DUMARAO, CAPIZ – Patay ang 32 anyos nga lalaki matapos ginluthang sang tatlo ka mag-ululutod sa Barangay Traciano, Dumarao, Capiz.
Ginkilala ang biktima nga si Roger Faderon Cardinal.
Base sa inisyal nga impormasyon nga nakuha sang Bombo Radyo gikan sa Dumarao Municipal Police Station, yara sa balay sang iya abyan ang biktima sang ginpalapitan ini sang mag-ululutod nga sanday Rey Farnaso, 43 anyos; Herminio Farnaso, 38 anyos; kag Hermi Farnaso, lunsay residente sang nasambit nga lugar.
Hinali na lamang nga ginluthang sang madamo nga beses sang mag-ulutod ang biktima sa magkatuhay nga parte sang iya nga lawas.
Gindala pa ang biktima sa ospital apang wala na matabangan matapos gindeklarar nga dead on arrival.
Sa karon padayon nga ginaayam sang mga kapulisan ang mga suspek nga madasig nagpalagyo matapos ang nasambit nga krimen.
(PHOTO FROM WEB)
