ROXAS CITY – Nagpositibo sa Coronavirus Disease 2019 ukon COVID-19 ang isa ka 32-anyos nga nagabusong nga babaye kag isa ka Locally Stranded Individual ukon LSI gikan sa Tondo Manila kag residente sang Barangay Bita, Dao, Capiz.
Ini ang ginpahayag ni Mr. Wilmor Robles sang Dao Municipal Disaster Risk Reduction and Management Office sang ma-interview sang Bombo Radyo Roxas
Ang nasambit nga pasyente ang asymptomatic ukon wala nakabatyag sang anuman nga sintomas sang nasambit nga balatian.
Ginkumpirmar ni Robles nga nagpositibo sa COVID-19 ang wala na ginhingadlan nga LSI matapos nga ginpaidalom ini sa Real Time-Polymerase Chain Reaction Test ukon RT-PCR test sadtong Hunyo 29 apang subong lamang nga adlaw Hulyo 10, 2020 nag-abot ang iya nga resulta.
Matandaan nga nag-abot ini sadtong Hunyo 26, 2020 sa probinsya kag gilayon nga ginpaidalom sa RDT iGg/iGm ukon Rapid Test apang negatibo ang iya resulta.
Apisar, nag negatibo ini sa nasambit nga test ginpaidalum sa gihapon ini sa 14 day quarantine.
Ginpahayag pa ni Robles nga tapos na kuntani ini sa iya nga 14 day quarantine subong nga adlaw apang wala ginalauman nga nagpositibo ini sa nasambit nga balatian.
Magluwas diri, ipaidalom man sa COVID19 test ang mga indibidwal ukon LSI’s nga nakaupod sini sa pagpauli sa probinsya sang Capiz subongman ang iya mga himata.
Ini bangud ginapahayag nga nakasakay pa ini sa ambulansya sang Panay gikan sa siyudad sang Iloilo kag ginabulubanta nga may yara ini sang apat ka iban pa nga mga kaupdanan nga residente sang Panay.
Sa karon, nagapabilin sa Roxas Memorial Provincial Hospital ukon RMPH ang nasambit nga pasyente para sa nagakaigo nga pagbulong.
Mahibaluan nga ini ang pinakauna nga LSI nga nagpositibo sa COVID-19 sa probinsya sang Capiz.
